طيب والله حرام عليهم وعلى اهاليهم الي بيعملوه فينا دا

فلوس في جيوب كبار الحراميه وال ايه بياخدو من الغني ويدو للفقير بعد رفع البنزين والسجاير .. ( بما ان الفقرا الي بيركبو مواصلات زي حالاتنا الاجره لما تترفع من جنيه ل 2 جنيه - مواصلات داخليه ) يبئى هو فعلا بيدعمنا

لما يكونو عارفين ان اصحاب المليارات (( معرفش المليار كام صفر انا اسمع الكلمه بتتقال كتير )) عليهم مديونيات للدوله تقدر ب 12 مليار جنيه زي ما الجهاز المركزي للمحاسبات قال وعند باقي الشركات والقطاعات الخاصه وصلو 47 مليار جنيه ميدونات للدوله

طيب فين دخل قناة السويس ياجماعه وفين دخل السياحه كمان ... حد يقولي ويفهمني كدا ليه بيعملو فينا كدا ؟


طيب شوفتو حكاية الغاز المدعم لاسرائيل ؟؟؟ شوفتو السولار الي بئى بجنيه وبريزه (( الهي بريزه تيجي في عينه قادر يا كريم تخرمها ))


انا بقول وباعلى صوتي (( لازم نتكاتف جميعا ونطالب بمحاكمة سامح فهمي وزير البترول واصدار جميع ممتلكاته ونسد بيها الشرط الجزائي بتاع تصدير الغاز لاسرائيل ونوقف التصدير )) حراااااااااااااااااااااام الي بيحصل دا والله


كل واحد مسئول كبير في البلد (( مسئول لو ما ضيعش فلوس البلد في الهوا )) بيفكر ازاي ياخد فلوس

ماهو برضو المسئولين في المركز القومي للرياضه عملو 4 حمامات سباحه اولومبيه ب 37 مليون جنيه بدون اي استخدام ليهم ... لا ولا لما استضافو فريق اجنبي يعلب ماتش كوره معاهم والمباراه ماتلعبتش ولا الناس جت وهم صرفو 490 الف جنيه على صيتها


الفلوس دي بتاعتنا احنا من الضرايب الي بندفعها ويطلع عنينا فيها (( ماهي الضرايب كمان بياخدوها مننا فرده -- كان عندنا محل اتقفل من سنة 1997 لغاية سنة 2008 بندفعله ضرايب ياجماعه المحل اتلغى والله واتقفل وفلسنا ولا حياة لمن تنادي يالدفع يا الحبس الهي يحبس دمكم وتموتو بدري بدري ))


دا الشعب ماشي بيكلم في نفسه ومش عارف يعمل ايه .. الناس ماشيه بئت بتاخدها مشي مفيش حد عارف يركب مواصلات من الغلاء الي حصل دا ..

اصل العيب فينا احنا الي ساكتين عليهم .. سكتنا في 4 مايو يوم ما ادلنا ال 30 % وبعد شويه رجع فكر فيها يظهر حس انه ندم ولا حاجه انه زودنا 30 % لما لقى الشعب سكت في 4 مايو فقال خلاص احنا ناخدهم 34 % زياده في السولار و 75 % زياده في البنزين ودا طبعا غير السجاير ( الهي يطفحها الي بيصنعها بوظت عقولنا )


انا بقول افضل حل نعمله نجيب عجل ونستخدمه بدل المواصلات واهو الواحد يوفر شويه فلوس يحاول يتعشى بيهما (( على اساس انها بئت وجبه واحده في اليوم ))


طيب هنعمل ايه ياجماعه .. بنتذل ونتبهدل وبنتسرق وبنفكر مليون مره ناكل منين ونعمل ايه !!

ياجماعه والله في ناس كتير مش عاجبها الي بيحصل وفي ناس بتعيط بالليل والنهار ومش عارفه تعمل حاجه وفي ناس بتمشي في الشارع بتكلم في نفسها


امتى طيب هنعمل ايه !!!! مش دي بلدنا وهم احتلونا ولا انا الي مش فاهم حاجه !!!

1 مايو الناس فرحت بالعلاوه و 4 مايو تم اغتيال فرحتهم بارتفاع سعر كل حاجه

ياجماعه حد يرد عليا ... هو انا هفضل اكلم في نفسي كدا كتير

عندك حق والله البلد خربت على رأى واحد مغنى شعبى الدنيا خربانة

اة والله يا بنتى هنقول إية ولا إية بس
احنا لو اتكلمنا الكلام مش هيخلص
يلا ماعلينا
مشكوووووووووووووووووووورة يا magi على الموضوع

فعلا هنقول اية ولا اية

الكلام عمرة ماهيخلص على البلد دى

لأن السرقة والفساد فيها من زمان

طول مافى حرامية يبقى اكيد فى سرقة وفى فساد وفى بطالة كمان