السلام عليكم ورحمة الله وبركاته

حبيت اكتب الموضوع دا افكركم بقوانين المشاركه والتسجيل في المسطبه يمكن الناس القديمه نسيت .. والناس الجديده ما تعرفهاش برضو ...


اول حاجه معنى انك سجلت في المسطبه فانت بالتاكيد موافق على الي في الموضوع دا لأنها حاجه مهمه جدا انك تلتزم بكل الي موجود في المسطبه

تاني حاجه لازم كلنا نحترم بعض وما نسخرش من بعض باي طريقه كانت سواء مباشره او غير مباشره .. سواء بكتابة رد او كتابة موضوع او حتى عن طريق الرسايل الخاصه " يعني ما الاقيش واحد كاتب موضوع يتريق فيه على عضو عن طريق تجسيد شخصيات في مسلسل كوميدي ويقولي حرية رأي "" دا طبعا كله مخالف


تالت حاجه احنا كلنا هنا اخوان واخوات واي حد هيثير فتنه بين الاعضاء هتتوقف عضويته باسرع وقت بدون اي انذار .. يعني ما الاقيش واحد جاي يشتكي من عضو او مشرف في الاقسام العامه ويخلي الناس التانيه تتشحن بالكره من ناحيته وممكن يكون العضو التاني مظلوم .... عايز تشتكي من عضو او مشرف في عندك قسم للاقتراحات والشكاوي ياريت ماتخرجش عنه والا هتتوقف عضويتك لمدة 7 ايام .


رابع حاجه المنتدى دا يتبع منهج أهل السنه والجماعه على الدين الاسلامي .. اي مذهب مخالف لاهل السنه ماينفعش اننا نتطرق لمواضيع فيه ولا حتى الاديان التانيه في قسم المناظرات ... ومعانا فيه استاذنا الكبير ديدات اي حد عايز يسأله عن اي حاجه يتفضل مشكورا في القسم المحدد .. غير كدا هيعتبر مخالف للقوانين وهتتوقف عضويته بشكل نهائي


خامس حاجه اي حد هيكتب مواضيع فيها اغاني او موسيقى او اي صور لنساء عاريات بالتاكيد بدون اي انذار هتتوف عضويته ... ربنا يرحمنا برحمته ويهدينا الى صراط مستقيم



سادس حاجه الاداره ليها الحق في التعديل على اي مشاركه شايفه انها غي لائقه .. وزي ما قلنا عندك تظلم او اقتراح ياريت تكتبه في الاقتراحات والشكاوي


سابع حاجه يمنع وضع اعلانات لاي مواقع اخرى في الموقع الابعد اخذ اذن الاداره


تامن حاجه يمنع التسجيل باي اسم مخالف للاداب العامه والشريعه الاسلاميه على منهج اهل السنه والجماعه

تاسع حاجه الرسايل الخاصه في ناس بتستخدمها في الحب والغراميات وفي ناس بتستخدمها في التعارف بين الولاد والبنات خصوصا طبعا اي حد هنمسكه مخالف في الرسايل الخاصه هتتوقف عضويته ... الرسايل الخاصه دي علشان لو في حد محتاج حاجه في المنتدى مش هنقضيها غراميات (( مفيش حد قال ان المسطبه ملتقى الاحبه ))



عاشر حاجه اسلوب مشاركاتك هتتحاسب عليه يعني اي اسلوب مستفز او اي كلمه غير لائقه هتتكتب في المنتدى هيعرضك لايقاف عضويتك


واخيرا الاداره بتعدل في القوانين دي من حين لاخر يعني لازم عليك تدخل كل شويه تشيك عليها وتشوف ايه الجديد لأنك ملزم بيها حتى لو ما قريتهاش


ياريت الكل يلتزم بالقوانين دي لأن اي شيئ بعد كدا مخالف هيكون في غير مصلحة المنتدى وطبعا كلنا بنحب منتدانا اوي

شكرا لاهتمامكم بقراءة بعض قوانين المسطبه