انا بصراحه اول مرة اتكلم مع حد واحكيله لانى متعودتش احكى لحد عن حاجه جوايا بس حسيت انكوا دخلتوا قلبى بسرعه فقلت يمكن تقدروا تساعدونى

انا بنت عاديه زى اى بنت بس انا من النوع العملى اووى ودايما بفكر عقلى وعمرى ماشغلت قلبى فاى حاجه لدرجه انى دلووقتى حاسه ان قلبى مات ومبقتش قادرة احب بيه

انا حاليا فى حد بيحينى وانا بحبه اووى بس المشكله انى حاسه انى فى سن مراهقه وان ده مش حب ومش قادرة احدد شعورى من ناحيه اى حد

وخايفه اظلم اللى بحبه معايا وفى نفس الوقت انا مقدرش اسيبه ولا حتى اعيش من غيره
ساعدونى ؟

هل اسيبه لغايه مااتأكد من شعورى وحس انى بقيت اكبر شويه

ولا افضل معاااه ؟

كويس انك حكيتى واتكلمتى معانا
واحنا كلنا هنا اخواتك ودايما معاكى
لو متضايقة او عايزة تاخدى رأينا فى
حاجة

بخصوص مشكلتلك انا عايزة اسألك سؤال
هو الانسان اللى متقدريش تستغنى عنه
او تسيبيه ده انتى معاه بصفتك ايه؟!
خطيبته.. ؟ أو متكلم عليكى مثلا؟

المشكلة الأكبر اللى انتى فيها مش ان
ده حب مرحلة مراهقة او حب مرحلة نضج
المشكلة ان دى سمعتك اللى لازم تحافظى عليها وتحافظى على قلبك ان
حد مبتربطكيش بيه اى علاقة رسمية
يجرحه فى يوم من الأيام وتيجى بعد كده
متقدريش تحبى اللى هتتجوزيه

انا عايزة اقولك ان الحب مينفعش الا للانسان اللى هيتجوزك و اتقدملك بس وبيكون

اساسه الإشهار قدام ربنا عز وجل والناس

ركزى فى دراستك دلوقتى ومستقبلك
ولو ليكو نصيب مع بعض هيجيلك ويتقدملك رسمى لكن هو دلوقتى انسان
مش متخرج ولا لسة يعرف مستقبله مثلا ولا
تعرفى بعد ده كله نظرة اهلك ليه هيوافقوا ولا لأ كل ده نصيب وفى علم
الغيب فبلاش تجاذفى بسمعتك

عارفه يا امه انا فكرت فى كلامك كويس لقيته صح

وتصدقى لما فكرت شويه حسيت انى كنت غلطانه وانى بعمل حاجه انا اهلى ودينى رفضناها
وانا متعودتش عليها

كلامك ريحنى يا امه بجد

وحاسه دلووقتى انى احسن بكتيرر

وانى لازم افكر فى مستقبلى كوويس

علشاان خااطر ماما وبابا وخااطر كل الناس اللى عايزة تشوفنى حاجه كويسه
انا متشكرة اووى

عشان انتى كويسة كده بجد واقتنعتى
بالصح واللى يرضى ربنا
بجد ربنا هيكرمك ان شاء الله
وهيديكى كل اللى بتتمنيه

كده الموضوع خلص واحنا ملناش لازمه

يا روزا انتي اخت عزيزه علينا
والكلام اللي قالته أمة الله صح مليون في الميه
ويا ستي لو هوا فكر انه يجي ويكلمك
خليكي على النور من البدايه
ودليه على طريق بيتك واهلك

وقتها لو في نصيب ما بينكم
يبقى كل خير وبركه
ولو مالكمش نصيب في بعض
يبقى قضاء الله وقدره ومحدش يزعل من شيء اتكتب عليه


انتي انسانه واعيه وعاقله من طريقة كلامك
ومش محتاجه للنصحيه فعليا على قد ما انتي محتاجه لبعض التوجيه
ومعتقدش ان بعد كلام أمة الله في كلام



تقبلي مروري
اخوكي
((((( مجنونك )))))

الحب مش غلط ياروز

انا رأيى من رأيى كل الاعضاء اللى ردوا قبلى

لازم تفكرى فى مستقبلك الاول بعد كدة فى اى حاجة تانية

بس فى نفس الوقت لو انتى كنتى قولتيلة انك بتحبية وكان فى فى يوم من الايام بينكم اى حاجة فانتى لازم ماتجرحيهوش خالص

لأن اصعب حاجة فى الدنيا كلها هي الجرح .


يارب تكونى احسن من الاول

واحنا اخواتك ومعاكى على طول لو احتاجتى اى مساعدة

بدايه روزا انا بحيكي على شجاعتك ودا خطوه جميله منك انك تاخد رأي اللي حواليكي ودا يدل على نضج عقلك

بصي حبيبتي انتي حاليا في مرحلة دراسه صح انا من رأي انك تركزي اكتر في دراستك ومستقبلك وتبلغي الشخص دا حاجه واحده بس وهيا انه لو عايزك يتقدم رسمي لاهلك وهنا تبدأي تفكري مع اهلك اذا كان دا يناسب ولا لا اما غير كدا ابعدي تماما واقطعي صلتك بيه بكل ادب واحترام وصدقيني لو هوا شخص جاد وعايز جواز هيتقدم ليكي ويبقى حبكم دا في النور وبرضى الله سبحانه وتعالى وعلم الاهل اما لو هوا لسه مراهق فلا هيتكلم ولا هيتحرك وهيكون المسأله عنده مجرد حب او اعجاب مراهقين

وانتي روزا باين عليكي انسانه ملتزمه وعاقله جدا ودا من خلال كلامك وخوفك اصلا من نوع العلاقه علشان كدا حبيبتي زي ما بقولك حاولي يكون اخر كلامك معاك هوا دا انه اما ارتباط رسمي بعلم الاهل او كل واحد يشوف مستقبله وطريقه وربنا ياروزا لو كاتب نصيب صدقيني هيجمعكم لبعض

ويارب تتقبلي مروري اختك بسمه

انا فعلا مقدرش ازود اي كلمه بعد كلام امة الله مشاء الله عليها تقريبا قالت لك كل حاجه ف الموضوع انا عايز اقولك مثل عجيب واحد صاحبي قالهولي والبنت اللي انا كنت مرتبط بيها من 3 سنين بتتخطب قالي محدش بيتجوز مرات غيره هههه والله مثل جامد اوي يعني كل واحد مننا ليه نصيب مهما عملتي او ارتبطي بيه او سيبتيه لو مكتبلك هتاخديه لكن لحد دلوئتي انتي متعرفيش هوه من نصيبك ولا لا فا بلاش تعذبيه او تعذبي نفسك بحاجه ملكمش يد بيها وربنا يوفئك ان شاء الله