بسم الله الرحمن الرحيم
أنا النهاردة جاى أتكلم وفعلا حاسس بالإحباط أوى وكل حاجة متدمرة ومش تمام , أنا هاخد رأيكم في حاجة وعايز أعرف أنا صح ولا غلط ,,,,
أنا بحب إنسانه بقالى 3 سنين دلوقتى وبكلمها , عمرى في يوم مزعلتها , من يوم ماعرفتها وهى حالتها النفسيه وحشة اوى وانا كنت بعافر علشان اطلعها من اللى هى فيه , وقفت جنبها بكل طاقتى علشان تجيب مجموع في الثانوية العامة وجابت الحمد لله , والله العظيم كنت بحبها بإخلاص مع إنها عمرها محسستنى بنفسي ولا مرة ولا حسستنى ان قلبها عليا ولا عمرها كانت بتعاملنى زى مبعاملها , يبقي أنا غلطان إنى حبيتها ولا ايه بالظبط , وأخر حاجة حصلت النهاردة إنى والله مكلمتهاش من شهر 8 اللى فات علشان هى في السنة الأخيرة من الثانوية العامه علشان تذاكر وتجيب مجموع ففي بداية السنة الجديدة بعتلها نتيجة وأجندة مع واحدة صاحبتها يعنى عادى مفيهاش حاجة , فقولت أتصل بيها أتطمن عليها النهاردة وفعلا اتصلت وردت عليا بس والله ياجماعة انا فعلا منهار , طول المكاملة ساكته وكل لما أقولها مالك تقولى مفيش حاجة وبعدين قالتلى إبقي إبعت خد النتيجة اللى انتا باعتهالى علشان مش هعمل بيها حاجة ملهاش لزمة ,, يعنى ده يرضي مين ياربي والله العظيم انا فعلا بذلت كل اللى عندى علشان خاطر أسعدها وهى بالمعامله دى حد يقولى أعمل إيه , واحد قالى انت معندكش كرامة , طيب هو أنا علشان بحبها يبقي معنديش كرامة علشان مستحمل جه كله ولا ايه بالظبط حد يقولى والله انا منا عارف أعمل ايه تانى معاها أكتر من اللى انا عملته وهى قلبها حجر ولا هنا .
معلش طولت عليكم بس غصب عنى والله مستنى ردودكم علشان أنا فعلا مش عارف أفكر في أى حاجة من اللى بتحصلي

اهلا عزيزي احمد

روق ياراجل الموضوع بسيط جدا ... انا عارف انك بتحبها وهي كمان بتحبك ... وممكن ان نتخيل سبب تصرفاتها معك بهذا الشكل لواحد من الاسباب الاتيه :

- ممكن يكون مضغوط عليها من اهلها .. بمعنى نوع من الانضباط والرقابه من داخل الاسره وبالتالي لن يكون عندها حرية حركه سواءا في الكلام او الخروج معاك

- او ممكن تكون عصبيه لفتره مؤقته .. وبعد كده عندما تهدأ ترجع معاك زي العسل تاني

- او يمكن هناك شخص قام بالوقيعه بينك وبينها ... وانت لاتعرف شئ



ولكن مع كل الاحوال ياحمد انت عارف انه غلط كبير ان الواحد يمشي مع بنت ويكلمها بدون ان يكون هناك علاقه شرعيه او رسميه بينهم ... وحط نفسك مكان ابوها او مكان اخوها ... هل ترضى بان اختك حد غريب يتكلم او يمشي معاها بدون وجود علاقه شرعيه ؟ ... طبعا لا ... عشان كده انا باقولك وطبعا باحترم مشاعرك جدا ومقدرها بس الاصول ياحمد محدش يزعل منها ... وانت بكره لما تكبر وتكون في مركز كويس ستجد مائة واحده مثلها ويمكن احسن منها .. تحبها وتحبك في اطار علاقه نظيفه وطاهره وشرعيه

الموضوع بسيط ياحمد واوعى هذا الموضوع يؤثر عليك وعلى مستقبلك

تحياتي واحترامي لك

أنا بشكرك جدا ياأبو على على كلامك الجميل ده بس انا كنت عايز أفهمك على حاجة :
الإنسانه دى أنا عمرى مخرجت معاها ولا قابلتها ولا مرة في حياتى علشان أنا فعلا بخاف على سمعتها , وكمان أنا أعرفها بقالى 3 سنين عمرى ماكلمتها في الشارع أو في أى حته والله العظيم بتكلم جد , وعلشان تبقي عارف انا كنت هخطبها السنة دى إن شاء الله بس أهو اللى حصل حصل بقي هو تقريبا مفيش نصيب بس الحمد لله على كل شئ , وأنا متشكر أوى على رأيك ياأبو على

أنا بشكرك جدا ياأبو على على كلامك الجميل ده بس انا كنت عايز أفهمك على حاجة :
الإنسانه دى أنا عمرى مخرجت معاها ولا قابلتها ولا مرة في حياتى علشان أنا فعلا بخاف على سمعتها , وكمان أنا أعرفها بقالى 3 سنين عمرى ماكلمتها في الشارع أو في أى حته والله العظيم بتكلم جد , وعلشان تبقي عارف انا كنت هخطبها السنة دى إن شاء الله بس أهو اللى حصل حصل بقي هو تقريبا مفيش نصيب بس الحمد لله على كل شئ , وأنا متشكر أوى على رأيك ياأبو على

مش عارف يا احمد اقولك ايه
انتا تقريبا الحكايه اللي انتا فيها دي من فتره طويله
وتقريبا بالنسبالي مبقتش قصه حب على قد ما هيا هم وحزن في قلبك
وزي ما قالك ابو علي اهتم بنفسك وبمستقبلك
بكره حتلاقي مليون غيرها
وانتا بنفسك قولت كل شيء قسمه ونصيب

وبعدين يا عم من غير زعل احنا اخوات وانتا عارف كده كويس
وحده مهما كانت ظروفها ومهما الدراسه خدت وقتها
لو بتحبك بجد ومهتمه بيك حتلاقي منها رساله ولو كل شهر
بتقولك انها بخير واطمن وادعيلها ربنا يوفقها

بس احنا مش حنستعجل الامور وزي ما قال ابو علي
يمكن هيا مضغوطه الفتره دي وبتحاول مش تقربك منها عشان
مش تزعلك او تدايقك

وانتا يا احمد مش صغير بسم الله وماشاء الله عليك عندك 20 سنه
يعني واعي لكل شيء بيحصل حواليك
اقعد مع نفسك وفكر بعقلك
وفكر لسنين عمرك اللي جايه
هل الانسانه دي تصح انها تكون زوجه ليا وام لاولادي ولا لاء ؟
لو بنيت كل اهدافك صح ولاقيتها بتشاركك حياتك
ومتفهماك بتفكيرك ومستقبلك

يبقى اتوكل على الله واتقدملها
وان شاء الله كل اللي انتوا فيه يروح وتكون فتره وعدت


تقبل مروري يا باشا
اخوك
((((( مجنونك )))))

( مجنونك ) بجد كلامك ---- جدا والله العظيم أنا كل اللى زعلان عليه إنى مش بلاقي المعامله اللى انا بعاملهالها أنا مش عارف إيه اللى حصل لده كله بس أنا والله كانت نيتى خير زى منتا عارف ان الشباب بتوع اليومين دول بيحاولوا انهم يلعبوا بمشاعر البنات وخلاص , إنما أنا والله كنت مخلص لأخر لحظة وكنت مستعد أخلص كمان , بس إظاهر إن القدر مش في صفي

انا معاك يا حبيبي انتا شايف نفسك مخلص وشايف نفسك رومانسي
وبسم الله وماشاء الله عليك مستعد تديها الحنان كله

بس هل هيا شايفه فيك كده ؟

يا احمد متسمحش لنفسك انك تعيش الوهم والاحلام
انا يمكن كلامي يزعلك بس والله عايز اخرجك من اللي انتا فيه
الحياه مش كلها علاقه ولد وبنت والحياه مش كلها اني عايز احب واتحب
انتا لسه وراك مستقبل مستنيك والمستقبل ده اهم من مليون
انسان بالنسبالك فكر بعقلك مش بعوطفك ولا بقلبك
نتا عايش الحياه كلها ليها وده اللي لمسته من كلامك عنها
يعني من غير زعل لو قولتلك دي متصحش انها تكون ليك حتقولي لاء
دي بالدنيا وما فيها حقولك ماشي انتا شايفها كده بس هيا يا حبيبي
مش شايفاك كده بدليل انها عمرها ما ودتك ولا قربت منك زي ما انتا قربت منها

بص يا احمد لنفسك ولحياتك واللي يشتريك اشتريه بس متشتريش انتا
انسان مش عارف لو هوا شاريك او لاء متحطش نفسك في موقف
انك تكون قاعد ومستني الدنيا انها تمشيك وانتا قولت احنا شباب في بعض
يعني ما فيش زعل من كلامنا سوا ومافيش داعي تزعل على حاجه عملتها
انا اللي لمسته من كلامك ان العلاقه دي حب من طرف واحد
مقدرش اقولك هيا بتفكر ازاي بس يا احمد ما فيش بنت بتحب انسان
وبترضى انه يتعذب معاها بالطريقه دي

شوف انتا ناوي تعمل ايه وبص لنفسك يا حبيبي والحياه موقفتش على بنت
حياتك لسه قدامك ومستقبلك كبير واحنا لسه في بدايه العمر شد حليك
واعمل لنفسك قرش وقرب من ربنا اكتر يمكن ربنا يرزقك باللي احسن منها

تقبل مروري كمان مره
ومعلش اني طولت عليك واسف لو دايقتك في كلامي
اخوك

((((( مجنونك )))))

لا بالعكس والله انا عمرى متضايق من كلامك , والله انا فعلا صرفت نظر عن الموضوع ده , بس والله انا اللى بتضايق منه إنى مش بعرف أخسر أى إنسان بسهولة دى اللى كانت مضايقانى وعلى فكرة انا كنت واقف جنبها علشان هى عندها ظروف أنا أعرفها وكنت بحاول إنى أخرجها من اللى هى فيه بس للأسف فعلا أنا عرفت أنها ملهاش عزيز زى مابيقولوا وممكن تبيع في ثانية علشان كده أنا والله كل لما بفتكر كل اللى انا عملته معاها مش بندم بس بزعل أوى من اللى هى عملته معايا وفي نفس الوقت والله انا مسامحها لأنها غصب عنها بس خلاص عمرى ماهدى لنفسي فرصة إنى أفكر فيها تانى لانى خلاص الفترة اللى انا وهى بعدنا من شهر 8 اللى فات كانت يعنى ساعدت شوية في إنى أنساها والحمد لله انا دلوقتى قدرت إني مكلمهاش ,,,,
بجد أنا متشكر اوى يامجنونك على نصيحتك الغالية ميرسي جد ا والله

على فكرة انا الحمد لله مشكلتى إتحلت الإنسانه اللى انا بحبها والله لقيتها بتتصل بيا وبتعتذر عن اللى حصل ده لأنه كان غصب عنها وحكتلى على الظروف بتاعتها والحمد لله رجعت الميه لمجاريها تانى وبقينا 100 100 أنا بجد فرحان اوى اوى اوى والله