انا هقولك يا امه الله لاني درست الموضوع ده

معنى كلمة ان الحلم متعلق على جناح يمامه ان الحلم بيتحقق زي ما بيتفسر عشان كده الرسول صلى الله عليه وسلم كان بيقول للست خير انشاء الله

بمعنى تاني مثلا انت شوفتي حلم او حلمت بحاجه معينه وفسرت الحلم على انه خير وهايحصل بيتحقق الحلم وبيكون خير انما لو فسرتيه على انه مش خير برضو بيتحق على انه مش خير
عشان كده الرسول صلى الله عليه وسلم امر ان الحلم مش يتفسر الا بعد ثلاث ليال

في ثلاث انواع للاحلام :الرؤيه --واضغاث الاحلام --والرؤى الشيطانيه

الرؤيه :دي بتكون من عند ربنا وبامره يعرفها الانسان ان دي رؤيه لما يصحى من النوم على اذان الفجر

اضغاث الاحلام :بيحلم الانسان بحاجات شغلاه او بيحلم بحاجه حصلتله (يعني مثلا انت نايمه وبتفكري في موضوع معين فبتحلمي بيه )

الرؤى الشيطانيه: ودي بتكون من وسوسه الشيطان زي الكوابيس مثلا ولازم الانسان لما يشوف حاجه زي دي ويصحى مفزوع من النوم
يتفل على الجنب الشمال ثلاث مرات وينام على الجنب اليمين واحسن طريقه عشان يتفادى الانسان الحاجات دي انه ينام متوضي

اما بالتسبه لحكم تفسير الحلم فانا والله ماعرفش
لكن في بعض الناس بتلجا لتفسير الحلم لما مثلا تكون مصليه صلاة استخاره وحلمت وما عرفتش تفسر الحلم

اما بالنسبه لنقطه ان تفسير الحلم تنبؤ بالغيب انا مش متفقه معاكي لان لو الانسان حلم بحاجه ها تحصل في المستقبل فده بيكون بامر من الله

اخيرا عايزه احكيلك على حكايه حصلت حقيقي كان في برنامج تفسير احلام على القناه السعوديه
اتصلت واحده بالشيخ وقالتله ان هي دايما بتحلم ان هي بتكسر بيض
فرد الشيخ عليها ان في حد عامل سحر ورميه عند بيتها وان هو مستعد انه يروح يفكلها السحر ده وطلب منها ان هي تسيب عنوانها
بعد كده عرفنا ان الست دي كانت مخليه بيتها من البيوت السيئه وان البيض اللي هي بتكسره هو البنات اللي بتدمرهم وتضيع شرفهم

اتمنى اني اكون افدتك واسفه على الاطاله

توقيع :سكسكه